與地產代理互動的5個小貼士

睇樓睇得多，接觸到的地產代理自然也多。找到好的代理，不論搵盤、還價、傾成交都會事半功倍。今次分享少少同代理溝通的經驗，希望幫到大家。

1. 清楚自己的需要及預算

睇樓初期，自己都未搞楚自己的想法，就行入地產鋪問附近有咩盤。從代理的角度想，一係呢條係水魚，一係呢個人根本就冇心買，浪費時間。所以有筍野都唔會益你。

究竟自己想要的是二房、三房？有裝、冇裝？自住、放租？budget預幾多、做幾多成按揭？最好都諗一諗。愈能清楚交代，代理愈能對到盤，亦覺得呢個客比較實在，搵野比你都岩用d，唔洗浪費大家時間。

2. 準備支票簿

好多時，追女仔把口幾叻都冇用，最後都要錢包夠實力先搞得掂。同代理溝通都一樣，你可以試下睇緊心儀單位的時候，帶埋本票簿去。如果想還個靚價，不妨出張細訂支票比代理幫手傾(約樓價3%，寫明想傾既價錢，單位同時限)。

第一，有野揸手，代理同業主傾都有多d彈藥。試問咩都冇，如果你係業主，會唔會咁順攤減十萬八萬比人？人性使然。第二，代理見你好似真係買，自然都會落多d咀頭，畢竟成到間野佢都有佣收。都係人性而己。

試過有一次，雖然落左票，最後業主縮沙買唔成，但代理之後都會自動自覺update其他盤，甚至連張有咩盤既手抄紙都拎埋出黎。關係搞得好，買樓上車自然順利d。

3. 不隨便要求折扣

買樓作為成世人重要的投資決定，自然咩都想慳得就慳。甚至有時想要求一d佣金折扣，打算慳返一萬幾千。

但其實代理都係人，都要開飯。除左基本月薪外，就是要靠佣金收入。雖然你或者會問，代理憑咩拎你幾萬蚊，佢地除左帶你睇下單位之外，有咩值呢個價？

我都有時會咁諗。但畢竟成個遊戲規則就係咁，入得場玩就要跟。所以，無謂為左個一萬幾千同代理糾纏，自己樣衰之餘，亦都搞差大家關係。山水有相逢，賣樓也好、再買樓都好，有個熟人點都好d。

4. 先小人，後君子

不過，買新盤的情況就有不同。由於佣金不錯，加上睇買家運氣(抽籤)，又不需同業主又氹又傾，所以不少代理都轉去做新盤。

買家數目得咁多，代理點樣突圍而出呢？除非超級靚仔靚女，否則大家都以回佣吸客。一般來說，個range可以係佣金既50%至90%不等，視乎點樣同代理傾。

有一次同代理入票前，明明已經傾好左8成半。到後來，入票時佢又話冇錢賺，又話話唔到事，最後連張協議上面幾成都唔肯寫。所以最後雖然抽到早段既籤，但都冇去到。始終心裡唔舒服，以及同冇誠信既人合作冇咩信心。

5.  自己都要做功課，最多信5成

代理終歸都係想收到佣。故為左促成交易，有時提供的資料未必準確，甚至會令買家招至損失。例如，假如你話想做8成/9成按揭後，將物業出租；若代理稱可以的話，就要加倍提防。根據相關指引，出租物業都多可以承做5成按揭。若被發現，債權人(如銀行)有權call loan, 追回當中差價。

又舉例，按揭上會的問題最好直接問銀行/按揭公司，因為10個代理基本上都話借到。但最後，假如touchwood上唔到會(唔過壓測)，除左要賠雙倍訂金外，仲要俾佣金代理，到時後悔都冇用。唔信? 之前報紙已經賣過，同層有吉宅上唔到會而損失50幾萬的故事。儲錢咁辛苦，自己睇足d都係應該的。

最後，希望大家都能夠搵到個幫到手的代理，早日有間安樂窩啦!

共享單車體驗

共享單車於全球盛行，由歐美席捲至亞洲各國。大熱的原因除了以創意方法解決市民「最後一公里」(由公共交通到住處)的回家問題外，也與環保減炭的生活概念相輔相成，備受各方認同。

香港於幾個月前開始有start up提供共享單車服務，未來亦都會有更多公司參與。撇除公共財爭議、經營模式和個別丟車落河的事件，知其弊時，同時都可以多了解它帶來的益處，以作出更佳判斷。

引用Steve Jobs一句說話 - 

"Customers don't know what they want until we've shown them."

事緣今天需要到郵局寄信，但郵局距離住所起碼需要步行15分鐘，加上天氣極度酷熱，見樓下泊位多了幾架綠色小蜜蜂，便心癢癢地想，why not give it try?

首先，於App Store下載相關程式。點選後，大概10-15秒程式便會出現在桌面上。

然後，程式會要求用家先以facebook或電郵開設一個戶口。因為懶的關係，飛快地選了以facebook帳號登記後，就到手機短訊確認碼進行核實的步驟。

最後，輸入信用卡的資料，轉帳$399的按金後(refundable)，登記便完成，前後不用3分鐘。還有時間google一下promotion code，enjoy埋頭30分鐘免費使用單車的offer。

開車的辦法更簡單。當完成登記手續後，程式介面會出現GPS地圖和一綠色unlock按鈕。點選按鈕，QR code scanner就會出現。只要對準車頭或車尾的QR code一scan，會聽到「卡」一聲，表示「恭喜你，你可以騎車了。」

現時的單車都很新淨，車身不重，有購物籃、前後燈和警示鈴。seat位可調高度，坐著都挺舒服。惟單車沒有波度可調，煞車時要比較大力按brake才見效，故只比較適合短距離代步。

本身15分鐘的路程，騎單車5分鐘便到了，真的很不錯。但由於前往郵局的一段均為行人路，故在港鐵站旁的泊位停下單車以繼續行程。那麼應該怎樣把單車上鎖呢？

於單車前前後後找了一分鐘，原來話都無咁易。只要在後輪左上方的按鈕推向上，聽到「卡」一聲，上鎖便完成了，而程式亦會顯示單車已上鎖，以及提供是次車程的路線、時間和收費。

後來，回程的時候本打算再騎單車，用餘下的25分鐘四處騎騎，然後再回家。不過，原來公司收費是每30分鐘收取$5，不足30分鐘亦會收取$5。所以，收費模式方面，如果更有彈性，相信會符合更多用家的需要。

總括來說，這次體驗其實是挺不錯的。以共享資源(定義有討論空間)和科技，能夠提供更多的生活便利，減少浪費，甚至能夠打破壟斷，的確值得鼓勵。如何協調好各方利益，進一步開發藍海，創造新的價值，是未來值得思考的問題。

且看一架小小單車能夠帶我們走得多遠。